काठमाडौ ।  काठमाडौँस्थित बङ्गलादेशको राजदूतावासले आफ्नै परिसरमा “बङ्गलादेश माछा महोत्सव २०२५” को आयोजना गर्‍यो। यस कार्यक्रममा काठमाडौँमा कार्यरत राजदूतहरू/मिसन प्रमुखहरू तथा कूटनीतिज्ञहरू, नेपाल सरकारका विभिन्न मन्त्रालयका वरिष्ठ अधिकारीहरू, व्यवसायिक नेताहरू, थिङ्क ट्याङ्क तथा नागरिक समाजका सदस्यहरू, लक्जरी होटलका प्रबन्धक तथा कार्यकारीहरू, सञ्चारकर्मीहरू आदि सहभागी हुनुहुन्थ्यो। कार्यक्रमको विशेष अतिथिको रूपमा नेपालका कार्यवाहक परराष्ट्र सचिव माननीय श्री कृष्णप्रसाद ढकालज्यूको उपस्थिति रहेको थियो।

कार्यक्रम दिउँसो २ बजेदेखि नेपाल र बङ्गलादेशको राष्ट्रिय गान बजाएर सुरु भयो र राजदूत महामहिमज्यूले स्वागत मन्तव्य राख्नुभयो। विशेष अतिथिको रूपमा बोल्दै कार्यवाहक परराष्ट्र सचिव ढकालले यो नवीन पहलको प्रशंसा गर्नुभयो र यस्ता कार्यक्रमले सांस्कृतिक सेतु बलियो बनाउने तथा नेपाल-बङ्गलादेशबीच आर्थिक, व्यापारिक र जनता-जनताबीचको सम्बन्ध थप सुदृढ बनाउने बताउनुभयो। उहाँले दुई देशबीचको द्विपक्षीय सहकार्य जनस्तरको सम्पर्क, व्यापार-ट्रान्जिट, ऊर्जा र लगानीतर्फ गहिरिँदै गएको र मत्स्यपालन, जलकृषि तथा खाद्य सुरक्षाको क्षेत्रमा पनि सहकार्य विस्तार हुने ठूलो सम्भावना रहेको उल्लेख गर्नुभयो।

स्वागत मन्तव्यमा बङ्गलादेशका राजदूत महामहिम श्री शफिकुर रहमानले बङ्गलादेशको समृद्ध र परम्परागत मत्स्य क्षेत्रको संक्षिप्त परिचय गराउँदै यो महोत्सवलाई बङ्गलादेशको नदीमय संस्कृति र सम्पदाको प्रदर्शन भएको बताउनुभयो। उहाँले माछालाई बङ्गलादेशी संस्कृति, जीविकोपार्जन, सामाजिक संरचना र राष्ट्रिय पहिचानको प्रतीक भएको उल्लेख गर्नुभयो। बङ्गलादेशको हजारौँ नदीले उत्पादन गर्ने विभिन्न जातका ताजा पानीका र समुद्री माछाको स्वाद, ताजगी र स्वादिष्टताले विश्वभरि ख्याति कमाएको कुरा उहाँले स्मरण गर्नुभयो।

राजदूतज्यूले यो महोत्सव सांस्कृतिक उत्सव मात्र नभई क्षेत्रीय सहकार्य र व्यवसायिक साझेदारी गहिरो बनाउने अवसर पनि भएको बताउनुभयो। हिमालको काखमा बङ्गलादेशी मत्स्यको यो प्रदर्शनी गर्न पाउँदा खुसी लागेको बताउँदै उहाँले नेपाल-बङ्गलादेश मैत्रीलाई “माछ-दाल-भात” नाम दिएर जोड्नुभयो – बङ्गलादेशको “মাছে ভাতে বাঙালি” र नेपालको “दाल-भात” लाई एकै ठाउँमा जोडेर। यो महोत्सव दुवै देशको जीवन्त र विविधतापूर्ण संस्कृतिको साझा प्रशंसाको प्रमाण भएको उहाँको भनाइ थियो।

महोत्सवमा बङ्गलादेशी मत्स्य क्षेत्रको विविधता प्रदर्शित गरिएको थियो। नेपालमा उच्च गुणस्तरका समुद्री माछा र सिफुडको माग बढ्दै गएकाले बङ्गलादेशी माछा र सिफुडका लागि बजार अवसर खोज्ने उद्देश्य पनि थियो। साथै, जलकृषि, दिगो मत्स्यपालन र सिफुड प्रशोधनमा विश्व नेता बनेको बङ्गलादेशको विशेषज्ञता प्रचार गरियो। यसले नेपाली आयातकर्ता, आतिथ्य व्यवसाय र बङ्गलादेशी मत्स्य निर्यातकर्ताबीच थप गहिरो आर्थिक सहकार्यको ढोका खोल्ने अपेक्षा गरिएको छ।

अतिथिहरूलाई परम्परागत र आधुनिक शैलीमा तयार पारिएका बङ्गलादेशका प्रसिद्ध ताजा पानीका र समुद्री परिकारहरू परोसिए। मुख्य आकर्षण थियो “स्मोक्ड इलिश (हड्डी निकालेको)” र “सर्सों इलिश” जुन बङ्गलादेशी शेफहरूले नै तयार पार्नुभएको थियो। कत्ला माछाको तरकारी, ग्रिल्ड लब्स्टर, ग्रिल्ड रेड स्न्यापर, फ्राइड सिल्भर पम्फ्रेट र श्रिम्प टेम्पुराको लाइभ काउन्टरले सबैको ध्यान खिच्यो। लामो जुँगावाला माछा (मागुर) र हेलिकप्टर माछा (बोयाल) को तरकारी, सम्पूर्ण ग्रिल्ड कोराल र ठूला झिंगे माछाको तरकारीले बङ्गलादेशको समृद्ध मत्स्य सम्पदा र भोजन परम्पराको झलक दियो।

यो महोत्सवको तयारीस्वरूप गत नोभेम्बर २४ मा राजदूतावासले ताजा र समुद्री माछाको प्रदर्शनी पनि गरेको थियो, जसमा नेपाली आतिथ्य क्षेत्र र व्यवसायिक समुदायातकर्ताहरूको उल्लेख्य उपस्थिति थियो।

राजदूतावास परिसरलाई बङ्गलादेश पर्यटन बोर्डका रङ्गीन पोस्टरले सजाइएको थियो जसले देशको समृद्ध सांस्कृतिक सम्पदा देखाउँथे। साथै, गत जुलाईको वीर जन-आन्दोलन र उदार प्रजातन्त्र, मानव अधिकार, भ्रातृत्व र न्यायसहितको “बङ्गलादेश २.०” को यात्रालाई झल्काउने पोस्टरहरू पनि प्रदर्शित थिए ।