उत्तर–दक्षिण व्यापारिक मार्ग विस्तार आयोजनाअन्तर्गत कालीगण्डकी करिडोर (बेनी–जोमसोम–कोरला) सडक आयोजनाले छुसाङ–घमी सडक खण्डको स्तरोन्नति तथा कालोपत्रका लागि बहुवर्षीय ठेक्का आह्वान गरेको छ ।

आयोजनाले शुक्रबार सूचना प्रकाशित गर्दै उक्त सडकलाई दुई प्याकेजमा ठेक्का आह्वान गरेको हो । आयोजना प्रमुख तेजस्वी शर्माका अनुसार छुसाङदेखि भेनासम्मको २०.१ किलोमिटर (पहिलो खण्ड) र भेनादेखि घमीसम्मको २०.१ किलोमिटर (दोस्रो खण्ड) सडक स्तरोन्नति तथा कालोपत्र गरिने छ ।पहिलो खण्डका लागि एक अर्बभन्दा बढी र दोस्रो खण्डका लागि करिब एक अर्ब रुपैयाँ लागत अनुमान गरिएको छ । कात्तिक महिनाभित्र ठेक्का सम्झौता गरी तिहारपछि काम सुरु गर्ने लक्ष्य रहेको आयोजना प्रमुख शर्माले बताए ।

यसअघि गत वैशाखमा अर्थ मन्त्रालयले यो खण्डका लागि रु तीन अर्ब १५ करोड बजेट सुनिश्चित गरेको थियो ।  कोरला नाकालाई सरकारले उच्च प्राथमिकतामा राखेको छ । नाका पूर्ण सञ्चालनमा आएपछि भन्सार राजस्वमा उल्लेख्य वृद्धि भएको छ । सडक स्तरोन्नति भएमा उपल्लो मुस्ताङको व्यापार, पर्यटन र स्थानीय आवागमनमा ठूलो सुधार हुने अपेक्षा गरिएको छ ।