काठमाडौं । यमनमा हुथी विद्रोही र साउदी अरब समर्थित सरकारी सेनाबीच रणनीतिक पहाडी क्षेत्र नियन्त्रणका लागि लडाइँ तीव्र बनेको छ । द्वन्द्व बढ्दै जाँदा हजारौँ मानिस घर छाडेर विस्थापित भएका छन् ।

इरान समर्थित हुथी समूहका नेता अब्दुल–मलिक अल–हुथीले अमेरिकालाई द्वन्द्वमा प्रत्यक्ष सैन्य संलग्नता नजनाउन चेतावनी दिएका छन् ।

सोमबार भएको भिडन्त क्षेत्रीय तनाव बढिरहेका बेला भएको हो । अमेरिकाले इरानमाथि गरेको युद्ध र इजरायलसँगको सैन्य कारबाहीपछि क्षेत्रमा तनाव बढेको छ । यसैबीच अमेरिकी सञ्चारमाध्यमले राष्ट्रपति डोनाल्ड ट्रम्पले आइतबार हुथीमाथि हवाई आक्रमण गर्न आदेश दिए पनि अन्तिम समयमा त्यसलाई रोकिदिएको बताएका छन् ।

अधिकारीहरूका अनुसार पछिल्लो हिंसामा कम्तीमा ६७४ जनाको मृत्यु भएको छ भने १ लाख ५८ हजारभन्दा बढी मानिस विस्थापित भएका छन् ।

अल जजिराका प्रत्यक्षदर्शीका अनुसार हुथीहरूले यसै महिना लालसागरको तटीय क्षेत्र तथा मोखा बन्दरगाह नियन्त्रणमा लिएपछि ताइज र लहज प्रान्तमा रहेको कहबुब पहाड कब्जा गर्ने प्रयास गरिरहेका छन् । लालसागरको बाब अल–मन्देब जलडमरूमध्य र मायुन द्वीपलाई नियाल्ने भएकाले उक्त पहाडी क्षेत्र रणनीतिक रूपमा महत्वपूर्ण मानिन्छ । यसलाई नियन्त्रणमा लिए हुथीहरूले सरकारी नियन्त्रणमा रहेको दक्षिणी क्षेत्रलाई तटीय क्षेत्रबाट अलग गर्न सक्नेछन् ।

अल जजिराकी संवाददाता महा अलीले ताइजबाट रिपोर्ट गर्दै कहबुब अहिले मुख्य युद्धक्षेत्र बनेको बताइन् । उनका अनुसार मोखा बन्दरगाह र मायुन द्वीप नियन्त्रणमा लिएपछि हुथीहरूले आफ्नो पछाडिको क्षेत्र सुरक्षित गर्न पहाडी क्षेत्रमा अघि बढ्ने प्रयास गरिरहेका छन् ।

ट्रम्पले आक्रमण अन्तिम समयमा रोकेको दाबी

लडाइँ भइरहेका बेला साउदी युवराज मोहम्मद बिन सलमानले अमेरिकालाई हुथीविरुद्धको युद्धमा सहभागी हुन पटक–पटक आग्रह गरेको समाचार सार्वजनिक भएका छन् । हुथीहरूले शनिबार साउदी राजधानी रियादमाथि आक्रमण गरेको दाबी गरेका थिए । पछिल्लो तनाव बढेपछि रियादमाथि भएको यो पहिलो आक्रमण भएको उनीहरूको दाबी छ ।

तर, रिपोर्टहरूका अनुसार अमेरिकाले अहिलेसम्म साउदीको आग्रह अस्वीकार गर्दै आएको छ ।

द न्युयोर्क टाइम्सले सोमबार जनाएअनुसार रियादबाट आएको नयाँ आग्रहपछि ट्रम्प प्रशासनले आइतबार हुथीविरुद्ध हवाई आक्रमण गर्ने तयारी गरेको थियो । तर, सैनिकहरूले विमानमा बम लोड गरिरहेका बेला ट्रम्पले अन्तिम समयमा आक्रमण रोकिदिएका थिए ।

हुथी नेता अल–हुथीले पनि अमेरिकाले साउदीसँग मिलेर आफ्नो समूहविरुद्ध सैन्य कारबाही बढाउने तयारी गरिरहेको दाबी गरेका छन् ।

उनले पाकिस्तान र टर्कीलाई पनि द्वन्द्वमा संलग्न नहुन आग्रह गरेका छन् । पाकिस्तान र टर्कीले साउदी अरबसँग पारस्परिक रक्षा सम्झौता गरेका छन् ।

विश्लेषकहरूले ट्रम्पले आक्रमण रोक्नुले नयाँ सैन्य प्रतिबद्धतामा अमेरिकी प्रशासनको अनिच्छा देखाएको बताएका छन् । मध्यपूर्वमा अमेरिकी सेना यसअघि नै विभिन्न सैन्य कारबाहीमा व्यस्त रहेकाले थप मोर्चा खोल्न कठिन हुने उनीहरूको भनाइ छ ।