काठमाडौं । दक्षिण कोरियाका राष्ट्रपति ली जे–म्युङले दुई उत्तर कोरियाली युद्धबन्दीलाई दक्षिण कोरिया पठाइएको जानकारी सार्वजनिक गरेको विषयमा युक्रेनले सार्वजनिक रूपमा माफी नमागे ‘थप कदम’ चाल्ने चेतावनी दिएका छन् ।

युक्रेनका राष्ट्रपति भोलोदिमिर जेलेन्स्कीले गत साता संयुक्त राष्ट्रसंघको महासभामा दुई उत्तर कोरियाली युद्धबन्दीलाई दक्षिण कोरिया पठाइएको जानकारी सार्वजनिक गरेका थिए । उक्त कदमप्रति दक्षिण कोरियाले असन्तुष्टि जनाउँदै त्यसबारे गोप्य राख्ने सहमति भएको बताएको थियो ।

युक्रेनका विदेशमन्त्री आन्द्रिय सिबिहाले बिहीबार यस विषयलाई ‘कूटनीतिक गलतफहमी’ भनेका थिए । उनले यो समस्या समाधान गर्न किएभले काम गरिरहेको पनि बताएका थिए ।

तर राष्ट्रपति लीले सामाजिक सञ्जाल एक्समा सिबिहाको भनाइ अस्वीकार गर्दै यो विषय “कोरियाली जनता र राष्ट्रको गरिमा”सँग जोडिएको बताएका छन् ।

लीको कार्यालयले गत साता युद्धबन्दीलाई दक्षिण कोरिया पठाउने विषय गोप्य राख्न युक्रेनले नै आग्रह गरेको जनाएको थियो । उत्तर कोरियाली सैनिकका परिवारको सुरक्षा तथा ती सैनिकलाई युक्रेनी युद्धबन्दीसँग साट्ने अवसर गुमाएको आरोपबाट बच्न युक्रेनले यस्तो आग्रह गरेको दक्षिण कोरियाको भनाइ थियो ।

तर जेलेन्स्कीको कार्यालयले दुई देशबीच उक्त विषय गोप्य राख्ने कुनै सहमति नभएको जनाएको थियो । त्यसपछि विवाद थप चर्किएको हो ।

जेलेन्स्कीले जानकारी सार्वजनिक गरेपछि दक्षिण कोरियामा राष्ट्रपति लीमाथि पनि आलोचना भएको थियो । विपक्षी दलले उत्तर कोरियालाई खुसी पार्न युद्धबन्दीलाई दक्षिण कोरिया पठाइएको विषय लुकाएको आरोप लगाएको थियो ।

रुसलाई युक्रेनविरुद्धको युद्धमा सहयोग गरिरहेका हजारौँ उत्तर कोरियाली सैनिकमध्ये ती दुई सैनिक पनि थिए । उनीहरूले यसअघि स्थानीय सञ्चारमाध्यमसँग आफूहरू दक्षिण कोरिया जान चाहेको बताएका थिए ।

युक्रेनी सञ्चारमाध्यमसँग बिहीबार कुरा गर्दै विदेशमन्त्री सिबिहाले यो समस्या “निकट भविष्यमै समाधान हुने” आशा व्यक्त गरे ।

“हामी यस विषयमा काम गरिरहेका छौँ । हाम्रा लागि दक्षिण कोरिया महत्वपूर्ण देश हो । हामी उनीहरूसँग हासिल गरिरहेको सहकार्यलाई निरन्तरता दिँदै ठोस परिणाम हासिल गर्ने गति कायम रहने आशा गर्छौँ,” उनले भने ।

सिबिहाको भनाइप्रति प्रतिक्रिया दिँदै राष्ट्रपति लीले भने किएभले “कोरियाली प्रायद्वीपमा युद्ध ल्याउने प्रयास” गरिरहेको आरोप लगाए ।

“सम्झौताका तथ्य स्वीकार गरेर माफी माग्नुको सट्टा उत्तर र दक्षिण कोरियाबीच निकट भविष्यमा सैन्य भिडन्त हुन सक्ने कुरा गरिरहेकोमा हामी गम्भीर दुःख व्यक्त गर्छौँ,” उनले एक्समा लेखेका छन् ।

रुसले युक्रेनमाथि पूर्णस्तरीय आक्रमण सुरु गरेदेखि दक्षिण कोरिया युक्रेनप्रति सहानुभूतिशील रहँदै आएको छ । तर दक्षिण कोरियाले सक्रिय युद्धमा संलग्न कुनै पनि देशलाई घातक हतियार उपलब्ध नगराउने आफ्नो पुरानो नीतिलाई निरन्तरता दिँदै आएको छ ।