काठमाडौं । नेकपा एमालेका अध्यक्ष केपी शर्मा ओलीले दमनकारी, पीडक र जनविरोधी शासकहरूको अन्त्य हुने बताएका छन् ।

छापा माध्यमका पत्रकारहरूले दिएको ज्ञापनपत्र बुझ्दै ओलीले जनताको आवाज दबाउने र अरूलाई अप्ठेरोमा पार्ने शासकहरूको जनताबाटै विरोध हुने बताए ।

‘जुन शासक दमनकारी हुन्छ, जुन शासक पीडक हुन्छ, जुन शासक जनविरोधी हुन्छ, अत्याचारी हुन्छ, अरुको आवाज दबाउँछ, अरुलाई बोल्न दिँदैन, अरुलाई अप्ठेरोमा पार्छ,’ ओलीले भने, ‘अरु अप्ठेरोमा पर्दा रमाउँछ, त्यस्ता शासकहरूको विरोध हुन्छ । त्यस्ता शासकहरूको जनताबाट विरोध हुन्छ, त्यस्ता शासकहरूको नाश हुन्छ ।’

धर्मशास्त्रमा समेत यही कुरा उल्लेख रहेको भन्दै उनले अहिलेका शासकहरूले पनि यसलाई बुझ्नुपर्ने बताए ।

‘त्यही थियो, त्यो कुरा सत्य हो । अहिलेका लागि पनि सत्य हो । अहिलेका शासकले पनि बुझ्नुपर्ने कुरा हो । मैले पनि शास्त्रकै कुरा गरेको हो,’ ओलीले भने ।

ओलीले आफू विगत ६० वर्षदेखि समानता र स्वतन्त्रताको पक्षमा संघर्ष गर्दै आएको दाबी गरे । उनले संयुक्त राष्ट्रसंघको बडापत्र र मानव अधिकारको घोषणापत्र पढेपछि समानता र स्वतन्त्रताको यात्रामा अघि बढ्न प्रेरणा मिलेको बताए।