काठमाडौं। नेपाली कांग्रेसका नेता शेखर कोइरालाले पार्टीभित्रको गम्भीर विभाजन र आसन्न दुई महाधिवेशनप्रति चिन्ता व्यक्त गर्दै मध्यमार्गी समझदारी र एकताको बाटो अपनाउन आग्रह गरेका छन्।

असोज १ गते जारी गरेको प्रेस बक्तव्यमा कोइरालाले मुलुकको वर्तमान अवस्था र कांग्रेसको आन्तरिक जीवनमा आएको विभाजनप्रति आफ्नो धारणा राखेका छन्। उनले भनेका छन्, ‘कुनै पनि राष्ट्रको जीवनमा अनेकन् उतार–चढाव आउँछन्। नेतृत्वले समझदारीपूर्वक सहमति र सहकार्यबाट अगाडि बढे राष्ट्र जोगिन्छ, नत्र कैयौं राष्ट्रले आफ्नो अस्तित्व गुमाएको इतिहास हामीलाई विदितै छ। नेपाल आज त्यही चौबाटोमा उभिएको छ।’

कांग्रेसको गौरवशाली इतिहास स्मरण गर्दै उनले संस्थापक नेताहरू विशेषगरी बीपी कोइरालाको दर्शनलाई आधार मानेर पार्टीले कहिल्यै स्वाधीनता र लोकतन्त्रसँग सम्झौता नगरेको उल्लेख गरे। तर अहिले पार्टीको अवस्थाप्रति दुःख व्यक्त गर्दै उनले भने, ‘दुःखका साथ भन्नुपर्छ, यतिखेर नेपाली कांग्रेसको पटकथा कहाँबाट कसले कसरी लेखिरहेका छन्, मलाई थाहा छैन। मलाई यसबाट पीडा छ।’

कोइरालाले आसन्न दुई महाधिवेशनबाट राष्ट्रियता र लोकतान्त्रिक आन्दोलनमा पर्ने आघात रोक्न मध्यमार्गी र विवेकपूर्ण समझदारीको बाटो खोज्नुपर्नेमा जोड दिएका छन्। उनले पार्टीलाई ‘बिभाजित, विघटनकारी र समुद्रमा गन्तव्य हराएको माझी’ जस्तो भएको बताए। साथै रसुवा, नुवाकोट, धादिङलगायत स्थानमा भएको विपत्तिका पीडितप्रति पार्टी संवेदनशील हुन नसकेकोप्रति पनि प्रश्न उठाए।

‘म कांग्रेस विभाजनबाट रोमाञ्चित हुनै सक्दिन,’ उनले लेखेका छन्, ‘कांग्रेसमा कोही हार्ने र कोही जित्ने अनि विजयी कांग्रेस हुँ भनेर कसरी उत्सव मनाउन सकिन्छ? यो कांग्रेसको संस्कार र संस्कृतिभन्दा भिन्न कुरा हो।’

कोइरालाले कसैप्रति आरोप–प्रत्यारोप नगर्ने बताउँदै सबै कांग्रेसजनलाई पार्टी एकता र राष्ट्र निर्माणको अभियानमा जुट्न हार्दिक अनुरोध गरेका छन्। उनले भने, ‘हामी उठ्छौं, जुट्छौं र जित्छौं। यही भरोसाबाट साधारणभन्दा साधारण कांग्रेस पनि असाधारण र राष्ट्र निर्माणमा जुट्न सक्छ।’

बक्तव्यको अन्त्यमा उनले गाउँ–टोलदेखि केन्द्र हुँदै विदेशसम्म बस्ने सबै साथीहरूलाई पार्टी एकतामा दृढ संकल्पका साथ लाग्न आग्रह गर्दै ‘जय नेपाल’ भनेका छन्।