काठमाडौं । लिथुआनियाका प्रधानमन्त्रीले रुसबाट उत्पन्न हुन सक्ने खतरालाई ध्यानमा राख्दै आफ्नो देशले नागरिकलाई सुरक्षित स्थानमा लैजाने योजना बनाएको बताएका छन् । तर, आक्रमण भएमा लिथुआनिया आत्मसमर्पण नगर्ने र प्रतिरोधमा उत्रिने उनले स्पष्ट पारेका छन् ।

प्रधानमन्त्री माइन्डाउगास सिन्केभिसियसले बीबीसीको ‘न्युज नाइट’ कार्यक्रममा लिथुआनियाली नागरिकले रुसबाट आफूहरूलाई ‘लगातार खतरा’ महसुस गरिरहेको बताएका छन् । यसको एउटा कारण लिथुआनियाको हवाई क्षेत्रमा प्रवेश गर्ने ड्रोनहरू रहेको उनले बताए ।

आफ्नो देशमाथि आक्रमण भएमा ‘हामी प्रतिरोध गर्नेछौँ, हामी युद्धमा संलग्न हुनेछौँ’ भन्दै उनले लिथुआनिया पछि नहट्ने बताए । तर, सम्भावित विभिन्न परिस्थितिलाई ध्यानमा राखेर योजना बनाइएको उनको भनाइ छ । उनले उदाहरण दिँदै वृद्ध नागरिकलाई सहरबाट सहज रूपमा बाहिर निकाल्ने र सडकमा ट्राफिक जाम हुन नदिने गरी योजना बनाइएको बताए ।

‘हामी विभिन्न परिस्थितिबारे सोचिरहेका छौँ । ती सबै विषय सार्वजनिक रूपमा धेरै छलफल भइरहेका छैनन्,’ सिन्केभिसियसले भने ।

‘हामीले ठोस खतराको सामना गरिरहेका छौँ । यो दैनिक रूपमा भइरहेको छैन, तर हामीले त्यसको अनुभव गरिरहेका छौँ र यो हाम्रो वास्तविकता हो,’ उनले भने ।

लिथुआनिया नेटोको सदस्य राष्ट्र हो र यसको स्थल सीमा रुसी भूभाग कालिनिनग्रादसँग जोडिएको छ ।

सिन्केभिसियसले बेलायतले आफ्नो रक्षा नीतिप्रतिको दृष्टिकोणमा ‘सोचाइ परिवर्तन गर्नुपर्ने’ पनि बताए । यद्यपि, लिथुआनिया रुसी सीमाको नजिक भएकाले आफूहरूले खतरालाई अझ नजिकबाट महसुस गरिरहेको उनले उल्लेख गरे ।

यो भनाइ नेटोका लडाकु विमानले लिथुआनियाको हवाई क्षेत्रमा प्रवेश गरेको एउटा ड्रोन खसालेको एक सातापछि आएको हो ।

ड्रोन कहाँबाट आएको भन्ने औपचारिक रूपमा पुष्टि नभए पनि लिथुआनियाका रक्षामन्त्री रोबर्टास काउनासले बीबीसीको ‘न्युजआवर’ कार्यक्रममा उक्त ड्रोन छिमेकी मुलुक बेलारुसतर्फबाट आएको बताएका थिए । बेलारुस रुसको प्रमुख सहयोगी राष्ट्र हो ।

बेलायतका रक्षामन्त्री वेस स्ट्रीटिङले भने, ‘लिथुआनियाली र इटालियन सेनाको तीव्र तथा व्यावसायिक कारबाहीका कारण नेटोले फेरि एकपटक आफ्नो हवाई क्षेत्रको सुरक्षा गर्न तयार रहेको देखाएको छ ।’

उनले भने, ‘हामी नेटोको प्रत्येक इन्च भूभागको रक्षाका लागि चौबीसै घण्टा एकजुट छौँ ।’

यस घटनाबारे मस्कोले कुनै प्रतिक्रिया जनाएको छैन ।

रुसले युक्रेनमाथि पूर्णस्तरीय आक्रमण सुरु गरेपछि युरोपका विभिन्न देशको हवाई क्षेत्रमा सैन्य ड्रोन प्रवेश गर्ने घटना बढ्दै गएको छ ।

लिथुआनियाको राजधानी भिल्नियसमा पनि गत मे महिनामा ड्रोनको चेतावनी जारी भएपछि स्थानीय बासिन्दालाई सुरक्षित स्थानमा जान भनिएको थियो । त्यस क्रममा केही समयका लागि विमान उडान र रेल सेवा समेत प्रभावित भएको थियो ।

यस वर्ष युक्रेनका ड्रोन छिमेकी बाल्टिक राष्ट्र एस्टोनिया र लाट्भियाको हवाई क्षेत्रमा प्रवेश गरेपछि नेटोका लडाकु विमानहरूलाई ती ड्रोन खसाल्न पटक–पटक परिचालन गरिएको छ ।

युक्रेनले भने ती ड्रोन आफ्नो निर्धारित मार्गबाट भड्किनुको कारण रुसी इलेक्ट्रोनिक युद्ध प्रविधि भएको आरोप लगाउँदै आएको छ । यस्तो प्रविधिले ड्रोनको उडान मार्ग परिवर्तन गर्न सक्छ ।

लिथुआनिया, एस्टोनिया र लाट्भिया सन् २००४ मा नेटोमा आबद्ध भएका थिए । उनीहरू नेटोको अनुच्छेद ५ का हस्ताक्षरकर्ता पनि हुन् । अनुच्छेद ५ अनुसार नेटोका कुनै एक सदस्य राष्ट्रमाथि भएको सशस्त्र आक्रमणलाई सबै सदस्य राष्ट्रमाथि भएको आक्रमणका रूपमा लिइन्छ ।