काठमाडौं । चिनियाँ राष्ट्रपति सी चिनफिङ अर्को साता उच्चस्तरीय वार्ताका लागि अमेरिकाको राजधानी वासिङ्टन पुग्दा राष्ट्रपति डोनाल्ड ट्रम्प विमानस्थलमै पुगेर उनको स्वागत गर्ने भएका छन् ।

अमेरिकी प्रशासनका वरिष्ठ अधिकारीहरूले पत्रकारहरूसँग शुक्रबार कुरा गर्दै सीको विमान बुधबार वासिङ्टननजिकै रहेको जोइन्ट बेस एन्ड्र्युजमा अवतरण गर्दा ट्रम्प स्वागतका लागि त्यहाँ उपस्थित हुने जानकारी दिएका हुन् । सामान्यतया ट्रम्पले विदेशी नेताहरूलाई ह्वाइट हाउसमा भेट्ने भएकाले विमानस्थलमै पुगेर स्वागत गर्नु असामान्य मानिएको छ ।

चीनका राष्ट्रप्रमुखको एक दशकभन्दा बढी समयपछि हुने यो पहिलो राजकीय भ्रमण हो । भ्रमणका क्रममा ट्रम्प र सीबीच महत्वपूर्ण वार्ता हुनेछ ।

भ्रमणको मुख्य कार्यक्रम बिहीबार हुनेछ । ट्रम्प र प्रथम महिला मेलानिया ट्रम्पले सी र उनकी पत्नी पेङ लियुआनलाई ह्वाइट हाउसको स्टेट फ्लोरमा आयोजना हुने विशेष स्वागत समारोहमा स्वागत गर्नेछन् । त्यसपछि ट्रम्प र सी रोज गार्डेनमा सैनिक परेडको निरीक्षणमा सहभागी हुनेछन् र त्यसपछि बन्द कोठामा वार्ता गर्नेछन् ।

मेलानिया र पेङबीच छुट्टै कार्यक्रम हुनेछ । त्यसको विस्तृत विवरण भने सार्वजनिक गरिएको छैन ।

बिहीबार साँझ ट्रम्प र मेलानियाले चिनियाँ प्रतिनिधिमण्डलका लागि ह्वाइट हाउसको इस्ट रुममा राजकीय रात्रिभोज आयोजना गर्नेछन् । सी र पेङ उक्त रात्रिभोजका मुख्य अतिथि हुनेछन् । दुवै नेताले सम्बोधन गर्ने कार्यक्रम छ ।

ट्रम्पले शुक्रबार ओभल अफिसमा पत्रकारहरूसँग कुरा गर्दै उक्त रात्रिभोजमा सहभागी हुन ‘हजारौँ मानिस इच्छुक’ रहेको बताएका थिए । ह्वाइट हाउसमा निर्माण भइरहेको नयाँ करिब १ हजार सिट क्षमताको बलरुम तयार नभएकाले त्यहाँ कार्यक्रम गर्न नसकिएको उनले बताए ।

प्रविधि क्षेत्रका प्रमुख व्यक्तिहरू पनि अतिथि

ह्वाइट हाउसले सार्वजनिक गरेको सूचीअनुसार रात्रिभोजमा अमेजनका संस्थापक जेफ बेजोस, टेस्ला तथा स्पेसएक्सका इलन मस्क, गुगलका सुन्दर पिचाई र डेल टेक्नोलोजिजका प्रमुख कार्यकारी माइकल डेल सहभागी हुनेछन् ।

त्यस्तै, एनभिडियाका जेन्सेन हुआङ, ओपनएआईका साम अल्टम्यान, सिटीग्रुपकी प्रमुख कार्यकारी जेन फ्रेजर र हालै एप्पलको प्रमुख कार्यकारी पदबाट हटेका टिम कुक पनि अतिथिको सूचीमा छन् ।

अर्को शुक्रबार सी र पेङ ह्वाइट हाउस फर्केर ट्रम्प दम्पतीसँग निजी चियापानमा सहभागी हुनेछन् । त्यसपछि ट्रम्प दम्पतीले उनीहरूलाई अमेरिकाका महत्वपूर्ण संस्थापक दस्तावेज राखिएको नेसनल आर्काइभ्सको भ्रमण गराउने कार्यक्रम छ । अमेरिका स्थापनाको २५०औँ वार्षिकोत्सव मनाइरहेका बेला उक्त भ्रमण हुन लागेको हो ।

भ्रमणपछि सी जोइन्ट बेस एन्ड्र्युज जानेछन् ।