काठमाडौं । नेपाल प्रिमियर लिग एनपीएलमा जनकपुर बोल्ट्सले काठमान्डु गोर्खाजलाई ८ विकेटले पराजित गरेको छ ।

कीर्तिपुरस्थित त्रिवि अन्तर्राष्ट्रिय क्रिकेट स्टेडियममा बिहीबार भएको खेलमा ११६ रनको लक्ष्य जनकपुरले १७.२ ओभरमा २ विकेटको क्षतिमा पूरा गरेको हो ।

जनकपुरका लागि मोइन अलीले अर्धशतकीय पारी खेले । उनले ५१ बलमा ३ चौका र ३ छक्का प्रहार गर्दै ५८ रनको योगदान गरे ।

सैफ हसन ४० रनमा नटआउट रहे । मयन यादवले ९ र तृत राज दासले ५ रन जोडे ।

काठमान्डुका लागि रिपोन मोन्डलले १ विकेट लिए ।

यसअघि कीर्तिपुरस्थित त्रिवि अन्तर्राष्ट्रिय क्रिकेट स्टेडियममा जारी खेलमा टस जितेर ब्याटिङ रोजेको काठमान्डु १९.३ ओभरमा अलआउट भएर ११५ रनमा समेटिएको थियो ।

काठमान्डुको ब्याटिङ ध्वस्त पार्ने क्रममा राहुल यादवले चार विकेट लिए भने सैफ हसनले दुई विकेट हात पारे । हर्मित सिंह, मोइन अली र ललित राजवंशीले समान एक विकेट लिए ।

राहुलले ४ ओभरमा ३१ रन खर्चेर चार विकेट लिएका हुन् । सैफले चार ओभरमा ११ रन मात्र खर्चेर दुई विकेट लिए । मोइनले चार ओभरमा २३ रन दिँदै एक विकेट लिए भने ललितले चार ओभरमा ३० रन खर्चेर एक विकेट हात पारे ।

ब्याटिङतर्फ काठमान्डुका भीम सार्कीले सर्वाधिक ३३ रन बनाए । उनले २९ बलमा चार चौका प्रहार गरे । राशिद खानले १४ बलमा दुई चौकासहित १७ रन जोडे भने स्मित पटेलले १३ रन बनाए ।

सुमित महर्जनले १० र हरिशंकर शाहले नौ रन बनाए । कप्तान करण केसीले १८ बलमा आठ रन मात्रै बनाउन सके । जहान्दाद खानले पाँच रन बनाए भने साम हेजलेटले एक रन जोडे । मोहम्मद आदिल आलम खाता नखोली आउट भए ।

काठमाडौंले अतिरिक्त ६ रन पाएको थियो ।