बागलुङ ।

साँघुरो बजार, नमिलेको भूगोल । छेउमै उलिएको भुजीखोला त्यहीँ भुजीखोलामाथि बन्दै छ- बुर्तिबाङ बसपार्क ।

बन्दै गरेको बसपार्क देख्ने कसैले पनि भन्दैनन्, कि यो ठाउँ सुरक्षित छ । तर नयाँ सहर आयोजना कार्यालय बुर्तिबाङले यहाँ बसपार्क निर्माण जारी राखेको छ ।

ढोरपाटन नगरपालिका–२ खप्तरीबाङ बुर्तिबाङ बजार र राष्ट्रिय गौरवको आयोजना मध्यपहाडी लोकमार्गको केन्द्रमा पर्ने हुँदा आयोजना कार्यालयले बसपार्क बनाउन यो ठाउँ रोजेको हो ।

लामो समयदेखि सास्ती खेप्दै आएका यातायात व्यवसायी, यात्रु र बुर्तिबाङ बजारवासीका लागि खप्तरीबाङमा बसपार्क बन्नु सुखद विषय त हो । तर, जोखिमयुक्त ठाउँमा बसपार्क निर्माण हुँदा भोलि ठुला दुर्घटना निम्तिने खतरा पनि उत्तिकै छ ।

डेढ दशकअघि सडकले बुर्तिबाङ बजार जोडिएसँगै पश्चिम बागलुङको मुहार फेरियो । तर अहिलेसम्म बसपार्क अभावमा अहिलेसम्म सास्ती नै छ । मध्यपहाडी लोकमार्ग नजिकै रहेको बुर्तिबाङ बजार १० नमुना सहर आयोजना अन्तर्गत पर्छ ।

सरकारले नमुना सहर निर्माण गर्न थालेको वर्षौँ बितिसक्दा गत वर्षदेखि बल्ल बसपार्क निर्माणकाे काम थालनी भएको छ ।

बढ्दो सहरीकरण र साँघुरो बसपार्कका कारण यातायातका साधान सडकमै पार्किङ गर्नुपर्ने स्थिति छ । जिल्लाकै दोस्रो ठुलो व्यापारिक केन्द्रका रूपमा रहेको बुर्तिबाङ बजार निसी, भुजी र तमानको संगमस्थल हो ।

ढोरपाटन नगरपालिकाको केन्द्रसमेत रहेको बुर्तिबाङमा अहिले साँघुरो बसपार्क छ । जहाँ १०-१५ वटाभन्दा बढी गाडी रोक्न मिल्दैन । चालकहरूले जथाभावी गाडी रोक्दा बजार नै अस्तव्यस्त बन्ने गरेको छ ।

त्यसमाथि स्थानीय व्यवसायीहरूले सडक पेटीमै सामान राख्दा पैदल यात्रुलाई झनै समस्या भएको छ ।

नयाँ सहर आयोजना कार्यालयले ढोरपाटन नगरपालिका–१ खप्तरीबाङ जग्गा खरिद गरि बसपार्क निर्माण गरेपछि सहज हुने अपेक्षा गरेको भए पनि यहाँ पार्किङ गर्नका लागि उचित नहुने स्थानीय चन्द्रलाल अर्यालले बताए ।

नदी किनारमा बसपार्क बनाउनु उपयुक्त नभएको भन्दै जग्गा खरिदनै खलत ठाउँमा भएको अर्याल बताउँछन् । जग्गा खरिद गर्ने समयमा स्थानीय तथा सर्वदलीय सर्वपक्षीय छलफल गर्नुपर्ने भए पनि सहरी विकास आयोजना र ढोरपाटन नगरपालिकाका प्रमुख देवकुमार नेपालीले आफूखुसी जग्गा खरिद गरेको उनले बताए ।

‘अहिले जुन बसपार्क निर्माण भइरहेको ठाउँ छ, त्यो अत्यन्तै जोखिमयुक्त ठाउँमा छ । खोलाको छेउमा अहिले धमाधम संरचना निर्माण भएको त्यो संरचना कति बेला खोलामा बढी आएर बगाउँछ, थाहा छैन । बसपार्क बनेपछि यहाँ गाडी पार्किङ हुनेछन्,’ अर्यालले भने, ‘बर्खाको समयमा त यहाँ पार्किङ कसरी गर्न सकिएला र ?, अहिले पनि त्यहाँ पुगेर हेर्ने हो भने भुजीखोला उर्लिएर माथिमाथि आएको छ, कुनै पनि बेला बसपार्कमा पसेर ठुलो क्षति नपुर्‍याउला भन्न सकिन्न । यसमा बेलामै नै ध्यान दिनुपर्ने देखिन्छ, यदि त्यसो गरिएन भने भविष्यमा गम्भीर दुर्घटना नहोला भन्न सकिन्न ।’

अहिले बन्दै गरेको बसपार्क उपयुक्त स्थानमा नभएको हुँदा सरोकारवाला निकायले सुरक्षित स्थानमा निर्माण गर्नुपर्ने यातायात व्यवसायी युवराज छन्त्यालले बताए । उनले बजारभन्दा टाढा र खोलाको नजिक हुँदा बर्खामा गाडीको सुरक्षा नहुनुको साथै यात्रु र गाडी चालकलाई बजार पुग्न समस्या हुने बताए ।

उनले भने, ‘हिउँदको समयमा त ठिक हुन्छ, बर्खामा त यहाँ गाडी पार्किङ गर्न कसैले आँट गर्दैन होला, खोला उर्लिएरै माथि पुग्दोरहेछ । असुरक्षित ठाउँमा गाडी किन पार्किङ गर्ने ?

बसपार्क अपायक ठाउँमा भएकाे भन्दै उनले भने, ‘गाउँ–गाउँ र काठामाडौँ पोखराबाट यात्रुलाई बसपार्कमा ल्याउनुपर्‍यो । बजार टाढा छ, उनीहरूलाई पुग्न गाह्रो हुन्छ, अझ बस्ने र खाजा खाने ठाउँ पनि छैन, सरोकारवाला निकायले ध्यान दिन जरुरी छ ।’

२०६८ सालदेखि सुरु भएको नयाँ सहर आयोजनाले जग्गा व्यवस्थापन गर्न ढिलाइ गर्दा बसपार्क निर्माण हुन सकेको थिएन । २०८० असार १५ गतेसम्म बसपार्क निर्माण सम्पन्न गर्ने गरी गत कात्तिक ७ गते आयोजनाको ठेक्का सम्झौता भएको थियो ।

अहिलेसम्म जम्मा ५० प्रतिशत काम सकिएको नयाँ सहर आयोजना कार्यालय बुर्तिबाङका निमित्त प्रमुख अभिषेक अधिकारीले जानकारी दिए । बसपार्क निर्माणको जिम्मा गोरखनाथ कन्ट्रक्सन एण्ड मरचेन्टाईजर प्रालिले पाएको छ । २०७५ मा ६ रोपनी जग्गा खरिद गरी विभिन्न प्रक्रिया पूरा गरेर बसपार्क बनाउन थालिएको उनको भनाइ छ ।

अहिले टर्मिनल भवन निर्माण भइसकेको र नदीमाथि तटबन्धन गरी जग्गा संरक्षण गरिरहेको अधिकारीले बताए । बसपार्कमा ३० वटा जिप, २० वटा बस र स–साना दर्जनौँ सवारीसाधन अट्ने उनको भनाइ छ ।

टर्मिनल भवन ३ तलाको बनेको उनले बताए । बसपार्क २ करोड २६ लाख ४० हजार ४३१ रुपैयाँमा बन्न थालेको हो । अब गाडी पार्किङका लागि ढलान गर्न, गेट निर्माण गर्न बाँकी रहेको अधिकारी बताउँछन् ।

बसपार्क निर्माणका लागि अघिल्लो वर्ष २ करोड रुपैयाँ विनियोजन भएको उनले जानकारी दिए । ‘ठाउँमा जग्गा खोज्यौँ, बुर्तिबाङ बजार नै खोलासँग जोडिएको छ, मध्यपहाडी र बजारसँग जोडिएको हुँदा यहाँ बनाउन थालिएको हो । बसपार्क मध्यहाडी लोकमार्गभन्दा टाढा पनि बनाउन मिल्दैन, बजारभन्दा टाढा पनि मिल्दैन । त्यसले गर्दा यहाँ बनाउन थालेका हौँ,’ अधिकारीले भने, ‘तटबन्धन गरेका छौँ जोखिम हुँदैन । अबको एक/डेढ वर्षमा सञ्चालनमा आउनेछ ।’