काठमाडौँ। अख्तियार दुरुपयोग अनुसन्धान आयोगले बागमती प्रदेशका प्रदेश प्रमुख दीपक प्रसाद देवकोटासमक्ष वार्षिक प्रतिवेदन पेस गरेको छ ।  आइतबार प्रदेश प्रमुख देवकोटासमक्ष अख्तियार दुरुपयोग अनुसन्धान आयोग कार्यालय हेटौँडाका प्रमुख उमाकान्त आचार्यले वार्षिक प्रतिवेदन पेस गरेका हुन् ।

प्रमुख आचार्यले नेपालको संविधानको धारा २९४ को उपधारा (३) बमोजिम आर्थिक वर्ष २०८०र०८१ मा सम्पादन गरेका काम कारबाहीहरू समेटेर तयार गरिएको ३४ औँ वार्षिक प्रतिवेदन पेस गरेका हुन् ।

प्रतिवेदन अनुसार आर्थिक वर्ष २०८०/०८१ मा आयोगमा २६ हजार ९१८ वटा नयाँ उजुरीहरू विभिन्न माध्यमबाट प्राप्त भएका छन् । अघिल्लो आर्थिक वर्षबाट जिम्मेवारी सरेर आएका ९ हजार २६८ वटा उजुरीहरू समेत गरेर आयोगमा ३६ हजार १८६ वटा उजुरी प्राप्त भएको थियो ।

गत आर्थिक वर्ष २०८०/०८१ मा प्राप्त ३६ हजार १८६ उजुरीमध्ये २७ हजार ७१४ (७६.५९ प्रतिशत) उजुरी स्क्रिनिङ र प्रारम्भिक छानबिनबाट फर्छ्यौट भएको आयोगको प्रतिवेदनमा उल्लेख छ । फर्छ्यौट गरेका उजुरीहरूमध्ये १३ हजार ५०० वटा उजुरीहरू आयोगको क्षेत्राधिकारभित्र नपरेका, गोलमटोल प्रकृतिका, हैरानी वा दुःख दिने नियतका र कुनै तथ्य प्रमाण बिनाका ज्यादै सामान्य प्रकृतिका तामेली गरिएको प्रतिवदनमा समावेश गरिएको छ ।

आयोगबाट फर्छ्यौट भएकामध्ये ९३२ वटा उजुरीउपर विस्तृत अनुसन्धान गर्ने निर्णय गरिएको छ भने ४९६ उजुरीउपर सुझाव दिई तामेली गरिएको र १२,७८६ उजुरीउपर कानुन बमोजिम अन्य आवश्यक कारबाही गरिएको छ ।

प्रारम्भिक छानबिनको क्रममा रही फर्छ्यौट हुन बाँकी रहेका ८ हजार ४७२ उजुरीहरू आगामी आर्थिक वर्ष २०८१/८२ मा सरेको छ ।