काठमाडौ । नेपाली कांग्रेसभित्र सभापति शेरबहादुर देउवा र कार्यवाहक सभापति पूर्णबहादुर खड्काबीचको शक्ति बाँडफाँटलाई लिएर विवाद चर्किएको छ। पार्टी महामन्त्री गगनकुमार थापाले बुधबार सार्वजनिक रूपमा देउवामाथि सबै शक्ति आफैंमा केन्द्रित राखेर खड्कालाई नाममात्रको कार्यवाहक बनाएको आरोप लगाएका छन्।
केन्द्रीय कार्यसम्पादन समिति बैठकपछि सानेपामा पत्रकारहरूसँग कुरा गर्दै थापाले भने, “सभापतिज्यूले कार्यवाहक दिनुभएको छ, तर नाम मात्रको। बैठकमा आउनुभएको छैन, तर बाँकी सबै शक्ति अभ्यास त्यहीँबाट भइरहेको छ।” थापाको यो अभिव्यक्तिले पार्टीभित्र लामो समयदेखि अल्झिएको महाधिवेशन र नेतृत्व विवादलाई झनै उजागर गरेको छ।
गत असोजमा स्वास्थ्य उपचारका लागि सिंगापुर गएका बेला देउवाले केन्द्रीय समिति बैठकमा उपसभापति खड्कालाई कार्यवाहक सभापतिको जिम्मेवारी दिएका थिए। त्यसयता खड्काले पार्टीका औपचारिक बैठकहरूको सभापतित्व गर्दै आएका छन्। तर राष्ट्रिय राजनीतिक छलफल र प्रमुख निर्णयहरूमा देउवा नै सक्रिय रूपमा अगाडि आउने गरेका छन्। यसले खड्काको भूमिकालाई गौण बनाएको भन्दै पार्टीभित्र असन्तुष्टि बढ्दै गएको छ।
निर्वाचन नजिकिँदै गर्दा अन्तरिम प्रधानमन्त्री सुशीला कार्कीले प्रमुख दलका शीर्ष नेताहरूसँग छलफल तीव्र पारेकी छिन्। यस्ता छलफलमा कांग्रेसको तर्फबाट देउवा नै सहभागी हुने गरेका छन्। राष्ट्रपति रामचन्द्र पौडेलसँगको भेटघाटमा पनि देउवाको सक्रियता देखिएको छ। यसले कार्यवाहक खड्काको हैसियतमाथि प्रश्न उठाएको छ।
खड्काले भने यस विषयमा मौनता साधेका छन्। न त उनले कार्यवाहक जिम्मेवारी फिर्ता गरेका छन्, न देउवासँग गुनासो पोखेका छन्। पार्टीका एक नेताका अनुसार, खड्का सर्वसम्मत निर्णय नभएसम्म केन्द्रीय समिति बैठक नै नबसाउने अडानमा छन्। यसले महाधिवेशन प्रक्रिया झनै पेचिलो बन्दै गएको छ।
कांग्रेसभित्र महाधिवेशनको मिति र प्रकियालाई लिएर संस्थापन र इतर पक्षबीच मतभेद छ। संस्थापन पक्ष निर्वाचनअघि महाधिवेशन गर्न अनिच्छुक देखिएको छ भने इतर पक्ष विशेष महाधिवेशनको माग गर्दै आएको छ। थापाको टिप्पणीले यो मतभेदलाई सार्वजनिक बहसमा ल्याएको छ।
आगामी फागुन २१ गते प्रतिनिधिसभा निर्वाचन तोकिएसँगै कांग्रेसको आन्तरिक एकता परीक्षणको घडी आएको छ। पार्टीभित्रको यो विवादले निर्वाचन तयारी र प्रदर्शनमा असर पर्न सक्ने विश्लेषकहरू बताउँछन्। देउवाले अभिभावकीय भूमिकामा सीमित रहने अपेक्षा गरिए पनि शक्ति अभ्यास जारी राख्नुले पार्टीको सर्वोत्तम हितमाथि प्रश्न उठेको थापाको आग्रह छ।