काठमाडौं। नेपाली कांग्रेसमा विगत दुई दशकदेखि पार्टी र शक्ति केन्द्रमा सक्रिय भूमिका निर्वाह गरिरहेका कृष्ण प्रसाद सिटौला यतिबेला पार्टीमा पर्ख र हेरको रणनीतिमा छन्।

पार्टीको १५ औं महाधिवेसन घोषणा भए पनि तत्कालिन पार्टी महामन्त्रीद्वय गगन थापा र विश्वप्रकाश शर्माको सक्रियतामा पुस अन्तिम साता विशेष महाधिवेशन गरेपछि कांग्रेसमा गगन नेतृत्वको कांग्रेसलाई निर्वाचन आयोगले मान्यता दिएकोमा सिटौला त्यसको विपक्षमा थिए।

फागुन २१ मा सुशीला कार्की नेतृत्वको सरकारले गरेको आमनिर्वाचनमा थापा नेतृत्वको कांग्रेसले प्रत्यक्ष तर्फका कांग्रेसको उम्मेदवारलाई टिकट वितरण गरेको थियो । निर्वाचनमा केही मत्थर भएको कांग्रेसको आन्तरिक कलह सुसुप्त भए पनि निर्वाचन पछि तीब्र भएको छ।

सभापति शेरबहादुर देउवा पक्षले गगन थापालाई पार्टीको अध्यक्ष मान्यता दिने निर्वाचन आयोगको निर्णयविरुद्ध सर्वोच्च अदालतमा मुद्धा दिएपछि दुबै पक्ष अहिले समानान्तर पार्टी संगठन चलाउन व्यस्त छन्।

सभापति देउवाले कार्यवाहक सभापतिको जिम्मेवारी दिएका पूर्णबहादुर खड्का र विशेष महाधिवेशनबाट सभापति घोषित गगन थापाले समानान्तर गतिविधि गरिरहँदा विशेष महधिवेशनका पक्षधरको कट्टर विरोधी सिटौला यतिवेला खड्का पक्षमा खुलेर लाग्न सकेका छैनन्।

थापाले पार्टी कार्यालयमा प्रतिनिधि सभा र राष्ट्रिय सभाका नवनिर्वाचित सांसदहरुले संसदीय जागरण कार्यक्रम संचालन गरिरहँदा देउवा पक्षका कार्यवाहक सभापति पूर्णबहादुर खड्काले आफ्ना पक्षका केन्द्रीय सदस्यहरुको बैठक बोलाएका थिए।

सोमबार मात्र खड्काले नवनिर्वाचित सांसदहरुको स्वागतमा कार्यक्रम गर्दा बरिष्ठ नेता डा.शेखर कोइराला पक्षधर सांसद र नेताहरुको उपस्थिति थियो।

यसअघि निर्वाचनको समिक्षा गर्न भनेर थापाले बोलाएको केन्द्रीय कार्यसमिति बैठकमा सिटौला पक्षधर भनेर चिनिएका पार्टीको कोशी प्रदेशका सभपाति उद्धव थापा उपस्थित थिए। यता खड्काले आयोजना गरेको नवनिर्वाचित सांसदहरुको स्वागत कार्यक्रममा समेत सिटौला पक्षधर सांसदहरु उपस्थित भएनन्।

मंगलबार खड्काले धुम्बाराहीस्थित स्मार्ट पार्टी प्यालेसमा आयोजना गरिएको देउवा पक्षधर केन्द्रीय सदस्यहरुको भेलामा नेता सिटौलासहित कुन्दनराज काफ्ले, उमाकान्त चौधरी, भिम प्रसाद पराजुली, शुसिला ढकाल लगायतका नेताहरु उपस्थित भएनन्।  बैठकमा शिव प्रसाद हुमागाईंको उपस्थिति थियो।

अघिल्लो हप्ता सिटौलासँग परिवर्तित राजनीतिक विषयमा सल्लाह गर्न नेता खड्का उनको निवास पुगेका थिए। तर सिटौलाले अदालतमा पार्टीको आधिकारिकता विचाराधिन रहेको भन्दै उपयुक्त समयमा कदम चाल्न नसक्दा गगनले पार्टी कब्जा गरेको भन्दै असन्तुष्टि जनाएका थिए।

उनले समय र सन्दर्भ वितिसकेको भन्दै अदालतमा बिचाराधिन पार्टीको आधिकारिकताको विषय निरुपण हुनु पर्ने धारणा राखेका थिए। उनले आयोगले मान्यता दिएको गगन थापा नेतृत्वको कांग्रेसका विरुद्ध औपचारिक रुपमा प्रस्तुत हुन नसक्ने संकेत गरेका छन्।

गगन थापाको कार्यशैलीको विरोधी सिटौला खड्काको गतिविधबाट पनि उतिसारो सन्तुष्ट छैनन्। खड्काले विगतमा आफूलाई पार्टी राजनीति, सत्ता संचालन र राजनीतिक अवसरमा सहयोग नगरेकोमा बेखुस छन्।

परिवर्तित परिस्थितिमा अदालतले समेत थापालाई नै मान्यता दिएमा आफूहरु पूर्णबहादुरलाई नेता मानेर अघि बढ्न नसक्ने भन्दै कुन्दन काफ्ले लगायतका सिटौला पक्षधर नेताहरु सिटौलालाई दबाब दिउका छन्।

विशेष महाधिवेशन पक्षधर नेता तथा महामन्त्री प्रदीप पौडेलले सिटौला पक्षधर नेताहरुलाई पुरानो संस्थापन छाडेर गगन थापा समूहमा एकीकृत हुनका लागि समन्वय, सम्पर्क र सहकार्यको प्रस्ताव लिएर अघि बढी रहेका छन्। सिटौलाको सक्रिय राजनीतिपछि उनी पक्षधरहरु गगन थापा समूहमा आएमा आफू बलियो हुने पौडेलको आंकलन छ।

हुन त सिटौलाले खुट्टामा समस्या भएर वैशाखी टेक्नु पर्ने र आँखाको समेत अप्रेसन गर्नु पर्ने भएकाले पार्टी र संसदीय राजनीतिमा उतिसारो सक्रिय हुन नसकेको आफू निकटलाई बताउँदै आएका छन्।

पार्टीको १३औं महाधिवेशनको सम्मुखमा तत्कालिन पार्टी सभापति सुशील कोइरालाको निधनपछि तत्कालिन संस्थापन पक्षबाट विद्रोह गरी तेश्रो धारको नेतृत्व गर्दै बेग्लै समुह (गुट) चलाएका सिटौला यतिवेला १४औं महाधिवेशनमा शेरबहादुर देउववालाई  सभापतिमा समर्थन गर्दै आफ्नो समूहबाट प्रदीप पौडेललाई महामन्त्री र उमाकान्त चौधरीलाई सहमहामन्त्रीसहित अन्य १८ जना केन्द्रीय सदस्यहरु उम्मेदवार उठाएका थिए।

देउवा समूहबाट महामन्त्रीमा पराजित भएका पौडेल महाधिवेशनको ६ महिनापछि नै देउवा समूह छाडेर डा.शेखर कोइराला समूहमा प्रबेश गरेका थिए।