जनकपुरधाम। नेपाली कांग्रेसका सभापति गगन थापाले पार्टीका पुराना सबै क्रियाशील सदस्यता खारेज भएको औपचारिक घोषणा गर्नुभएको छ । बुधबार मधेस प्रदेशस्तरीय निर्वाचन समीक्षा गोष्ठीलाई सम्बोधन गर्दै थापाले अब नयाँ प्रणाली र नयाँ जोसका साथ सदस्यता वितरण गरिने बताउनुभयो ।

सभापति थापाले भन्नुभयो, “पुराना पद्धति र प्रणालीबाट बनेका सबै क्रियाशील सदस्यता निर्वाचनपछि स्वतः खारेज भइसकेका छन् । अब वैशाख १ गतेदेखि म आफैँले आफ्नै वडाबाट नयाँ सदस्यता लिएर ‘जरा अभियान’ सुरु गर्नेछु ।” उहाँले देशभर वडा तहदेखि नै पार्टी संगठन पुनर्गठित गर्ने योजना रहेको स्पष्ट पार्नुभयो ।

सभापति थापाले पार्टीभित्रको अन्तरघात र गुटबन्दी अन्त्य गर्न संख्याभन्दा गुणस्तरमा जोड दिनुपर्नेमा जोड दिनुभयो । “हामीलाई १० लाख कागजी सदस्यको आवश्यकता छैन, एक लाख अनुशासित र काम गर्ने सक्रिय सदस्य भए पुग्छ,” उहाँले भन्नुभयो, “जसले भविष्यमा फेरि अन्तरघातको सामना गर्न नपरोस् ।”

उहाँले कांग्रेसका भ्रातृ तथा शुभेच्छुक संगठनहरू वर्षौंदेखि तदर्थवादमा चलेको र पुराना नेताहरूले कब्जा जमाएको आरोप लगाउनुभयो । अब नयाँ पुस्तालाई अवसर दिने गरी विधान संशोधन गरिने उहाँको भनाइ छ । स्थानीय तथा प्रदेश सरकारमा रहेका मन्त्री र जनप्रतिनिधिहरूको कार्यसम्पादन समीक्षा गर्न उपसभापति विश्वप्रकाश शर्माको नेतृत्वमा छिट्टै टोली गठन गरिने पनि थापाले जानकारी दिनुभयो ।

कार्यक्रममा मधेस प्रदेश सभापति एवं मुख्यमन्त्री कृष्णप्रसाद यादवले निर्वाचन परिणाम अप्रत्याशित रहेको स्वीकार गर्दै पार्टीको कमजोरीको निर्मम समीक्षा गर्नुपर्ने बताउनुभयो । गोष्ठीमा मधेसका आठै जिल्लाका सभापतिहरूले संगठनात्मक अवस्थाबारे विस्तृत रिपोर्टिङ गरेका थिए ।

यो घोषणालाई कांग्रेसभित्रको ‘संगठनात्मक क्रान्ति’को रूपमा हेरिएको छ । पार्टी नेतृत्वले पुरानो संरचनालाई पूर्ण रूपमा खारेज गरी आधारभूत तहबाट नयाँ ढङ्गले निर्माण गर्ने प्रयास गरेको हो । तर यो अभियानलाई पुराना नेता र कार्यकर्ताहरूले कसरी लिन्छन् भन्ने प्रश्न भने बाँकी छ । यदि ‘जरा अभियान’ सफल भयो भने नेपाली कांग्रेसले नयाँ उर्जा र गति प्राप्त गर्न सक्नेछ ।