काठमाडौं । काठमाडौंमा जारी नेपाली कांग्रेसको संस्थापनइतर समूहले आयोजना गरेको राष्ट्रिय भेलालाई ‘राष्ट्रिय सम्मेलन’मा रुपान्तरण गरिएको छ ।

शुक्रबार भेलाका रूपमा उद्घाटन गरिएको कार्यक्रमलाई शनिबार ‘सम्मेलन’को रूप दिइएको हो । सम्मेलनमा शनिबार विभिन्न प्रस्तावहरूमाथि छलफल भएको छ । बन्दसत्रमा विभिन्न समितिका प्रतिवेदनहरूमाथि प्रदेशगत रुपमा छलफल गरिएको छ ।

सम्मेलनमा नेता डा.प्रकाशशरण महतले कांग्रेसको आर्थिक तथा सामाजिक नीतिसम्बन्धी प्रतिवेदन, नेता विमलेन्द्र निधिले राजनीतिक प्रतिवेदन, नेता रमेश लेखकले ‘कानुन तथा विधान समिति’मार्फत ‘विधान संशोधन अवधारणा पत्र’, उमाकान्त चौधरीले सांगठनिक प्रतिवेदन, नेता एनपी साउदले समसामयिक विषयलगायतका प्रतिवेदन पेस गरेका छन् ।

देशभरबाट आएका करिब ३५ सय प्रतिनिधिहरूले प्रस्तुत प्रतिवेदनमाथि विभिन्न समूहमा विभाजन भएर छलफल गरेका छन् । सम्मेलनमार्फत १५ औँ महाधिवेशनको तयारी १४ औँ महाधिवेशनबाट निर्वाचित केन्द्रीय कार्यसमितिको निर्णयले आयोजना गर्ने विषयलाई प्राथमिकता दिएका छन् ।

शनिबार बोल्ने अधिकांश नेताहरूले पार्टी एकतामा जोड दिंदै सर्वोच्च अदालतको आदेशअनुसार अघि बढ्ने प्रतिक्रिया दिए । तत्कालीन सभापति एवं पूर्वप्रधानमन्त्री शेरबहादुर देउवाले आफूले नचाहँदा नचाहँदै पार्टीको विशेष महाधिवेशन गरिएको बताउँदै अदालतमा मुद्दा विचाराधीन रहेको अवस्थामा यसबारेमा आफूले धेरै नबोल्ने पनि जानकारी दिए ।

सम्मेलनका बारेमा जानकारी दिंदै नेता मीन विश्वकर्माले विधान संशोधनका विषयमा पनि बृहत छलफल भइरहेको बताए ।

उनले भने, ‘विधानमा दफावार संशोधन नगरेर सैद्धान्तिक सहमतिको कुरा गरिराखेका छौं । विधानमा केही भाषा अस्पष्टता भएका कारणले कार्यान्वयन गर्न अप्ठ्यारो परेको छ । सबै तहको कार्य समितिहरूलाई चुस्त र समावेशी बनाउने प्रयासमा छौं । युवाहरुको सहभागिता बढाउने गरी व्यवस्था गर्नुपर्नेमा जोड दिएका छौं ।’

अदालतमा मुद्दा विचाराधीन अवस्थामा रहेकाले महाधिवेशनको मिति भने अहिले नतोक्ने जानकारी दिए । ‘हामी १५ औं महाधिवेशनलाई एकताको महाधिवेशन बनाउने प्रयास गरिरहेका छौं । मुद्दा विचाराधीन अवस्थामा रहेकाले मिति चाहीं अहिले नै नतोक्ने भनेका छौं तर सानेपामा रहेका साथीहरू कुनै चामत्कारिक निर्णय लिएर आउनुभयो भने सोहीअनुसार अघि बढ्छौं,’ उनले भने ।