काठमाडौँ । चीन सरकारले निजामती कर्मचारी अस्पताललाई ‘लाइफ-लाइन एक्सप्रेस हंकंङ फाउण्डेशन’मार्फत करिब दुई करोड रुपैयाँ मूल्य बराबरको आँखा उपचारसम्बन्धी अत्याधुनिक उपकरण हस्तान्तरण गरेको छ।

मिनभवनस्थित अस्पताल परिसरमा आज आयोजित कार्यक्रममा चीनको राष्ट्रिय स्वास्थ्य आयोगका पूर्वउपमन्त्री चुइ लीको नेतृत्वमा रहेको टोलीले ती उपकरण हस्तान्तरण गरेको हो।

हस्तान्तरण गरिएका उपकरणमा आँखा परीक्षण गर्ने माइक्रोस्कोप, कम्प्युटर, स्क्यान मेसिन, क्यामेरालगायत छन्।

त्यसअवसरमा राष्ट्रिय सभाका उपाध्यक्ष विमला घिमिरेले नेपाल र चीनबीच प्राचीनकालदेखि नै बहु आयामिक, मैत्रीपूर्ण र घनिष्ठ सम्बन्ध रहेको बताइन्। चीनसँगको सम्बन्धलाई नेपालले उच्च महत्त्व दिएको बताउँदै उनले चीनले नेपालमा लगानी प्रवर्द्धनका साथै सडक पूर्वाधार, विद्युत् विकासलगायतका क्षेत्रमा महत्त्वपूर्ण सहयोग गर्दै आएकोमा धन्यावाद ज्ञापन गरिन्।

सांघाई सहयोग संघसँग सम्बन्धित छिमेक सहयोग नियोगका उपाध्यक्ष एवं चीनका पूर्वउपमन्त्री चुइ लिले नदी र पहाडले जोडिएको नेपाल–चीनबीचको सम्बन्ध  सरकारी  तहमा मात्र नभई जनस्तरमासमेत न्यानो, मित्रवत् र बहु आयामिक रहेको बताए।

उनले चीन सरकारले लिएको नीति तथा कार्यक्रमलाई सघाउने उद्देश्यसहित  छिमेकी देशहरूको सम्बन्धलाई अझ सुदृढ र घनिष्ठ बनाउन बनाउन सांघाई सहयोग संघ क्रियाशील रहेको स्पष्ट पारेका छन्।

फाउण्डेसनका अध्यक्ष तामु यु चुङले चिनियाँ सरकारको सहयोगमा नेपालमा सञ्चालित निजामती अस्पतालको क्षमता विस्तार गर्न सक्दो सहयोग गर्ने प्रतिबद्धता व्यक्त गरेका छन्।