काठमाडौँ । नेपाली महिला फुटबल टोलीले आज प्रधानमन्त्री केपी शर्मा ओलीसँग भेटेका छन् । बुधबार काठमाडौँमा भएको साफ महिला फुटबल प्रतियोगितामा उपविजेता टोलीसँग प्रधानमन्त्री ओलीले आज भेट गरेका हुन् ।
भेटका क्रममा खेलाडीले आफूहरूले सरकारबाट पाउनुपर्ने साथ सहयोग नै नपाएको गुनासो गरे । खेलाडी प्रीति राईले अहिलेसम्मको आफूहरूको प्रदर्शनबाट सन्तुष्ट नै रहे पनि सरकारको भूमिका प्रति असन्तुष्टि जनाइन् ।
‘तर, मलाई के लाग्छ भने जुन खेलाडीहरूलाई हरेक कुरामा साथ चाहिनुपर्थ्यो त्यो पाएका छैनौँ’, भेटमा राईले भनिन्, ‘म्यानेजमेन्टको कुरामा, स्मोस्नली सपोर्टमा । हामी खेलाडीलाई खेलको मात्रै प्रबलम भएमा मात्रै हामी सबै जना फ्रि हुन्थ्यौँ ।’
खेलाडी भएवापत् सरकार र सरोकारवाला निकायबाट पाउनुपर्ने साथ नपाउँदा खेलमा पनि आफूहरू ‘डिस्ट्रयाक्ट’ हुनुपरेको गुनासो प्रधानमन्त्री ओलीलाई राखिन् । ‘हामीलाई मन लागेर खेल्न सक्ने वातावरण बनाइदिनोस् !’ उनले भनिन्, ‘तपाईँहरूले फाइनान्सियल सपोर्ट होस्, मेन्टल सपोर्ट होस्, तपाईँहरूले गरिदिनुभयो भने धेरै राम्रो हुन्छ ।
आफूहरूले खेलुञ्जेलमात्रै राम्रो भएको तर, घाइते भएको अवस्थामा पनि अर्को समस्या भोग्नुपर्ने गुनासो राईको थियो ।
भेटमा खेलकुद मन्त्री तेजुलाल चौधरीले नेपाली खेल क्षेत्रको विकासका लागि सरकार सकारात्मक नै रहेको बताए । उनले खेलाडीसँग विभिन्न ऐन, कानुनले गर्दा पनि घोषणा भइसकेका पुरस्कार र सम्मान रकम दिन नसकिएको बाध्यता सुनाए ।
बुधबार भएको साफ महिला फुटबल च्याम्पियनसिप फाइनलमा नेपाल बांङ्लादेशसँग २-१ ले पराजित भएको थियो ।
खेलाडीको गुनासो सुनिसकेपछि प्रधानमन्त्री केपी शर्मा ओलीले उनीहरूले राखेको मागप्रति आफू सकारात्मक रहेको बताए । रंगशाला पुरानो भइसकेकाले नयाँ रंगशालाका लागि ठाउँ खोजी भइरहेको र चाँडै बन्नेसमेत उनले खेलाडीलाई जानकारी गराएका थिए ।
प्रतिक्रिया