काठमाडौं । प्रधानमन्त्री बालेन शाहले प्रतिनिधिसभाको बैठकमा भोटेकोशी बाढीबाट भएको क्षति तथा सरकारले गरिरहेको उद्धार, राहत र पुनःस्थापनाका कामबारे जानकारी गराएका छन्।

बुधबार बसेको प्रतिनिधिसभाको बैठकमा समय माग गरेर प्रधानमन्त्री शाहले भोटेकोशी बाढीपछि सरकारले गरेका कामकारबाहीबारे विस्तृत जानकारी गराएका हुन्।

उनले बाढीबाट प्रभावित क्षेत्रमा उद्धार तथा राहतका लागि सरकारले तत्कालै विभिन्न संयन्त्र परिचालन गरेको जानकारी दिँदै प्रभावित नागरिकको उद्धार, राहत वितरण तथा अवरुद्ध सडक र सञ्चार सेवा सञ्चालनका लागि भइरहेको प्रयासबारे संसद्लाई अवगत गराएका छन्।

प्रधानमन्त्री शाहले बाढीबाट भएको मानवीय तथा भौतिक क्षतिको विवरण संकलन भइरहेको र प्रभावित क्षेत्रको अवस्था सामान्य बनाउन सरकारले प्राथमिकताका साथ काम गरिरहेको बताए।

प्रधानमन्त्रीले समयमै सूचना नभएको भन्ने विषयमा प्रस्टीकरण दिएका छन् । उनले यो मानव सभ्याताकै ठूलो विपत्ति भएको उल्लेख गर्दै बाढीको सूचना पाउनासाथ सुरक्षाकर्मी परिचालन गरिएको बताएका छन् । उनले सूचना दिन परिचालन भएका सुरक्षाकर्मी नै बाढीमा बेपत्ता भएको बताएका छन् ।

हाइड्रोका सुरुङमा उद्धार हुन नसकेका विषयमा पनि उनले संसद्‌मा जानकारी दिएका छन् । उनले अहिलेको समस्या संसारमा यसअघि नभएको विशेष प्रकारको भएको बताएका छन् । उनले यो पहिरो र बाढीले गर्दा समस्या भएको बताए ।